قصائد سعود الفهد

" الغيره "

أغفر لي الذنب وأغفر كل زلاتك
الغيرة أعمت عيوني وانت تدري بي

اباتغلى عليك و طوّل سكاتك
ورديت لك غصب ما رديت من طيبي

أغار وازعلك واشفق لضحكاتك
ضيعت ماعدت أميز وش مطاليبي

شف حالتي مابقى لي غير شوفاتك
مجبور انا فيك لو غيرك يهلي بي

اقرا خفاياك لا طالعت نظراتك
وأخاف قطع الرجا يا مبيح غيبي

عطني أمل لا تقول الركب قد فاتك
بعض المطر يسبقه عج ولواهيبي

حلوة عيوبك وأنا عشاق غلطاتك
وعشقت شيبي لانك مظهر شيبي

تبي الصراحه عليك أغار من ذاتك
أغار..وأغتاظ.. هذي هي عذاريبي

.........................................................................................................

قلبي يناشدني يبي شي مفقود *** عن حاجة من غير وده فقدها
يسأل وانا دنقت من دون مردود *** عجزت اطلع كلمة يعتمدها
ماقلت لا ضايع ولاقلت موجود *** سكت ماكنه لروحي نشدها
اخفيت ماكنيت والجوف ملهود *** والنار في روحي تزايد وقدها
عليك ياللي تفتن الناس بالسود *** سود العيون اللي فوادي عبدها
وجدي وجود ام الولد زوجة العود *** اللي نهار الكون داسو ولدها
جضت لشوفه بين شاهد ومشهود *** وعضت عليه ابهامها من نكدها
وجتله تلمه والحشاء منه مسرود *** والدم من جوفه مغطي جسدها
وصاحت بصيحه مالها حد وحدود *** وجرت شعرها من بلاها بيدها
وراحت تجيب العود من قلة الفود *** تشكي تقول انه توفى سندها
وابوه شاف ومات حسره ومضهود *** وبقت عجوزه في سكنها وحدها
عليك ياحلو البها ناعم العود **** حلو الليالي لاتغير عهدها
ارفق بحال سعود ياغاية سعود **** انا دخيلك لاتربط عقدها
......................................................................................................